कल्याण-डोंबिवली पालिकेकडून कर्तव्यदक्ष डीसीपी अतुल झेंडे आणि त्यांच्या टीमचा गौरव; सर्वपक्षीय नगरसेवकांकडून अभिनंदनाचा ठराव मंजूर.

पुणे जिल्हा प्रतिनिधी

कल्याण-डोंबिवली शहरात अंमली पदार्थांच्या विळख्याविरुद्ध ‘झिरो टॉलरन्स’ धोरण राबवत धडक कारवाया करणाऱ्या पोलीस उपायुक्त अतुल झेंडे आणि त्यांच्या टीमच्या कार्याची दखल आता थेट कल्याण-डोंबिवली महानगरपालिकेने घेतली आहे. त्यांच्या या उल्लेखनीय कामगिरीबद्दल महासभेत सर्वपक्षीय नगरसेवकांनी एकमताने अभिनंदनाचा ठराव मंजूर करत या पोलीस अधिकाऱ्यांच्या कार्यावर शिक्कामोर्तब केले आहे. या गौरवानंतर मूळचे पुरंदरचे असलेले अतुल झेंडे यांच्यावर सोशल मीडिया आणि स्थानिक स्तरातून अभिनंदनाचा वर्षाव होत आहे.

अंमली पदार्थांविरुद्धचा लढा यशस्वी

पोलीस उपायुक्त अतुल झेंडे यांच्या नेतृत्वाखाली कल्याण-डोंबिवली पोलिसांनी अंमली पदार्थांच्या अवैध नेटवर्कविरोधात विशेष मोहीम उघडली आहे. या मोहिमेअंतर्गत अनेक ठिकाणच्या अड्ड्यांवर धाडी टाकत गुन्हेगारांच्या मुसक्या आवळल्या आहेत. विशेष म्हणजे, अनेक आरोपींवर ‘मकोका’ (MCOCA) अंतर्गत कठोर कारवाई करण्यात आली असून, कोट्यवधी रुपयांचे अंमली पदार्थ जप्त करण्यात यश आले आहे. या धडक कारवाईमुळे तरुण पिढीला अंमली पदार्थांच्या विळख्यातून वाचवण्यास मोठी मदत झाली आहे.

महासभेत उमटले कौतुकाचे सूर

कल्याण-डोंबिवली महापालिकेच्या महासभेत जेव्हा हा विषय चर्चेला आला, तेव्हा सत्ताधारी आणि विरोधी अशा सर्वच पक्षांच्या नगरसेवकांनी पोलीस प्रशासनाच्या कामगिरीचे मुक्तकंठाने कौतुक केले. शहरातील कायदा व सुव्यवस्था अबाधित ठेवण्यासाठी पोलीस विभागाने दाखवलेली तत्परता प्रशंसनीय असल्याचे सदस्यांनी नमूद केले. या कठोर कारवाईमुळे पालकांमध्ये सुरक्षिततेची भावना निर्माण झाली असून, पोलिसांवरील जनविश्वास अधिक दृढ झाला आहे, असे मत सभागृहात व्यक्त करण्यात आले.

पोलीस दलाचे उंचावले मनोबल

अतुल झेंडे यांच्या मार्गदर्शनाखाली त्यांच्या सहकाऱ्यांनी आणि तपास पथकाने दाखवलेली निष्ठा आणि धाडस यामुळे गुन्हेगारी टोळ्यांचे धाबे दणाणले आहेत. केवळ अंमली पदार्थच नव्हे, तर इतर गंभीर गुन्ह्यांतही पोलीस यंत्रणा अत्यंत सक्रिय झाली आहे. हा अभिनंदनाचा ठराव म्हणजे केवळ वैयक्तिक गौरव नसून, ती संपूर्ण पोलीस दलाच्या जिद्दीची पोचपावती असल्याचे बोलले जात आहे.

या सन्मानामुळे पोलीस दलाचे मनोबल उंचावले असून, भविष्यातही शहराला व्यसनमुक्त आणि सुरक्षित ठेवण्यासाठी ही मोहीम अधिक तीव्रतेने राबवली जाईल, असा विश्वास व्यक्त केला जात आहे. पुरंदर परिसरातील नागरिक आणि शुभचिंतकांकडून अतुल झेंडे यांच्या पुढील वाटचालीस शुभेच्छा दिल्या जात आहेत.